白玫瑰: 瑜伽日記

筆試

Tue, 16 Oct 2007 05:18:18 GMT

終於考完第一個試 - 筆試, 而昨日亦己公佈成績, 好彩合格, 雖然比我自已期望低分了少許, 但至少都合格拉 ^ ^。很可惜同班的一個同學肥左, 要再補考, 所以我地幾個決定這個星期六擔任補習老師, 與她一起溫習, 希望她能暢利渡過。雖然第一重考試渡過了, 但仍然還有6項要考, 所以大家都仍需努力。

導師課程完成了

Tue, 18 Sep 2007 05:30:44 GMT

一年的導師課程終於上完了最後一課, 回想起第一天上課的情景, 好像是不久之前的事。過去的一年, 真的認識了很多關於瑜伽的事, 一年前的我從來都沒有想過自己真的可以當起導師來亦加強了自信心。這個課程真的教許了我很多東西, 見識了不少。現在的我真的改變了很多, 相信好多過壞, 亦令到自己知道自己想追求什麼及需要什麼。雖然完成了所有課程, 但仍然要應付多項的考試。希望能夠得到好的成績.....

成功感

Wed, 08 Aug 2007 01:50:11 GMT

踏足社會做事都已很久了, 從來都未曾在工作上有過任何成功感, 又或者這樣說, 我的工作是聽從指導做事, 每天都刻板工作, 工作可以是為了生計而已。由上年開始決定修讀瑜伽導師課程, 初初都懷疑自己是否可以勝任, 但經過一年多的學習及教班經驗, 自信心強了很多, 對此份工作越來越投入, 越來越喜歡。

昨天開始了我的第一次, 終於有自己的一班學生, 雖然之前都有教班經驗, 但始終都是代課形式, 都稱不上是自己學生。有自己一班學生的感覺非常開心及滿足, 那份感覺言語真不能夠形容。尤其是當學生稱呼自已 "老師前, 老師後", 那份喜悅到現在還未消失。

2-3 Asia Yoga Conference

Wed, 06 Jun 2007 01:24:54 GMT

終於在上星期六、日上了幾位出名的瑜伽導師的workshop, 真係獲益良多。由早上8:30開始至晚上7時完結。首先是上左我最崇拜的導師David Swenson 堂, 那堂主要講解倒轉, 後彎動作同少少呼吸法。雖然唔係講解好多個動作, 但他在堂上講得好生動有趣, 令到在場氣氛好好, 見到佢個真人同佢本書個樣都冇咩分別, 唔通反瑜伽真係能夠令人stay young。

當天大約有一百人出席, 大部份都係導師, 亦有其它國家專程來香港上堂的導師。個個都好專業, 好開心見識到好多叻人, 我地大家一有時間就不定咁同其它導師交流一下心得。完堂時, 本來沒有打算可以同David Swenson影到合影, 但居然都比我zip到埋去同佢影到一張相 v^^v……我開心到不得了, 不過唔記得提埋本書比佢簽番個大名 =.=

黃昏時我地就出席令一個workshop係 “雙人瑜伽” 可能你聽到”雙人瑜伽”都會聯想成”傷人瑜伽”哈哈哈~~~~~~,有可能的, 當不投入的時侯, 任何一種瑜伽都有可能把身體弄傷, 小心!小心! 初初見他們的示範, 開始時有點質疑, 一班不是太了解對方身體的人做這樣的瑜伽是否可能呢! 對老師來說當然是無問題拉, 不過當在做動作時找到對方身體的受力點後 ,所有的疑慮都會慢慢放下。

”雙人瑜伽”主要分為上下兩部分, 下部分為基礎受力的一方, 上部分是做出不同動作的一方,其實做起來比看起來輕鬆。當大家找到平衡位置, 自由的思想, 輕鬆的身體, 就好像飛行在空氣裡, 很有趣, 感覺很好, 有些動作的配合是需要比較強壯的下部份, 有的動作下方基礎部份不需要太大力量 (連我也可以支持一些壯男呀!!!!!),只要找到平衡點便可以輕鬆地支持上面的人, 睇下我d相就知拉^ ^ 。跟住呢部份係我最喜歡就係yoga massage, 我地亙相替對方massage, 係由一些瑜伽動作 + 泰式按摩合成, 雖然老師話其實要學6個鐘先學到一般基本動作, 但佢地用了十分鐘講解了一些平日練習完後大家同學都可以亙相替對方舒緩一下疲勞的動作。比partner message 完後 , 真係好正, 好舒服呀!!!!!! 等我得閒免費替d朋友仔做下massage先 , 唔係好易唔記得 : ))

令人沮喪的教班日子

Fri, 01 Jun 2007 03:30:26 GMT

尋晚教班時, 我既老師居然出現係我個班上堂, 搞到我好緊張同有d亂。唔知點解佢睇住我上堂好驚好大壓力, 不過落堂後佢都有比番d comment我, 叫我應該點教會再好d, 仲有咩要改善。可能有佢係度關係, 我d自動信心一度跌到零咁濟, 所以講野把聲好細聲, 執學生時又搞錯左方向 (咁個學生當然唔知拉 )。而家發覺理論同實踐係真係唔同, 無論你講得幾天花隆重, 但一到實踐就總是樣樣都差d差d, 所以經驗真係要草番黎。不過我會首先克服緊張先其它再慢慢改善, 希望唔會令對我有期望既朋友, 老師失望。

Astavakrasana (Crooked Limb Pose)

Tue, 29 May 2007 08:54:02 GMT

表演完後又開始番難辛既練習, 老師呢2個星期教左個新動作, 但好難呀, 連上都上唔到, 我自己就未領略到應該點做, 唔知要練幾耐先可以做到呢 ???

瑜伽表演

Mon, 14 May 2007 02:28:39 GMT

星期五一早我地就係信德碼頭集合, 一齊過大海。其實我地唔洗咁早去因為3點先開始彩排, 但係我地唸住早d過去行下同食下野先, 順便遊下澳門。一到步就首先去一間好舊式的茶餐廳度食佢地個豬扒飽同雪糕, 因為呢兩樣係好出名。雪糕係佢地自己整, d豬扒好鬆軟, 好好味。食完一個少少的小食後, 我地跟住就去食碗仔翅, 一碗翅都係十幾文, 真係有翅同好多料係裏面, 我地老師就叫左一鍋金牌翅, 其實味道就一樣不過多左好多料係裏面, 好似海參, 花膠, 木耳等等, 總之好抵食。話時話呢間”添發小食店”係好出名, 好多香港人都識, 因為原來閒日都好多人幫趁。

買手信呢樣就唔少得, 因為順路關係, 所以我地買完手信先再去食飯, 我地沿途就一路買野一路食, 唔好睇我地個個瘦猛猛, 原來個個都好食得下。黎到澳門就緊係要試下葡國菜, 我地於是去左一間叫Ah Li既葡國餐廳食lunch, 個度環境好靚對住過海同大橋, 我相信夜晚個景一定好靚。

今次個場地比起會展細好多, 只可以放到2架車, 但對我地黎講會好d, 唔洗再排過位。大約6點d客人陸陸續續進場, 到了7時半就到我地表演, 可能經過上次既經驗, 今次演出比上次更加好, 主辨機構都好滿意。

我地訂左9點半船番香港, 但我地8點就可以走得, 於是就入閘搭早d船, 但冇唸過咁多人, 我地都wait左一個鐘先有位比我地上船 =.=。番同香港都成10 點幾, 大家都有d 餓就走去蘭桂方食埋飯先番屋企, 攪下攪下成點幾先訓。

雖然今次個表演大家都用左好多時間同努力, 但大家都覺得呢個係一個好好的體驗。

演出成功

Mon, 07 May 2007 02:55:58 GMT

上星期五雖然帶病上場好彩都冇影響到個表演。我地個日12點就己經到左會展彩排, 不過大家第一件事都係睇架新車先再睇場地, hahaha.... 不過我自己對車就冇咩興趣。原來個日主辦機構仲請埋係Madonna演唱會到表演FREE RUNNER個個鬼仔(好靚仔嫁, 不過未同佢混熟, 所以唔敢同佢影相, 唔緊要我地呢個friday會再見, 我一定要同佢影張合照先得 ), 見到佢地3個人既表演真係好西利, 雖然彩排佢地未用全力但都睇到我地眼定定....

個日一共要表演2場, 一場3點而另一場晚上9點。三點個場係比傳媒同記者影相, 所以我地都要化好晒妝同set好晒頭。話時話個個化妝師同set頭佬個就真係唔pro, 大家都發覺我地平時番工個妝仲靚過佢化, 個stylist好似唔識抋髻咁, 見佢好手忙腳亂, 真係想問佢我洗唔洗借埋我對手比佢用 =.=。

可能3點個場係表演比d media睇所以冇咁大壓力, 大家個表現都好出色。不過冇唸到夜晚個場咁多人出席, 所以好緊張。雖然有少少出錯, 不過表演完後得到好多掌聲鼓勵, 那份緊張同失落都一掃而空。希望黎緊係澳門既演出都同香港一樣咁成功拉

Ashtanga Yoga (Power Yoga)

Mon, 30 Apr 2007 01:59:55 GMT

不知不覺反左 Ashtanga Yoga 都有2個幾月, 發覺自己真係進步左唔少, 夠力左好多, 起碼做到vinyasa都仲有力做。有時當自己做到d難度較高的式子真係有d鼓勵作用, 話到比自已聽只要勤力練習總有一天係做到。當然反yoga既目的唔係為左要做到d好難度高的動作, 但自己就從學習過程中可以學到忍耐, 不斷學習及不要氣餒既精神, 同唔好同人比較, 因為每個人都有自己既長處同短處。

上星期六我就係可以做到以下呢幾個動作拉 ^ ^

免費瑜伽班

Fri, 27 Apr 2007 01:36:17 GMT

上埋下個week我就完成左assistant的任務, 就開始教班, 所以我地一班同學就決定大家夾份租一個studio黎教班practice 下。而所有學生都係自己d朋友仔, 最好係未曾接觸過yoga個d就更加好。因為我地有part 考試係考我地如何幫d唔識反既人考我地即時反應同體驗。其實我平時都多留意左 d初學者, 原來一d好簡單動作對佢地黎講都係好難, 所以要學習如何幫到佢地。而家都係以實習形式教, 所以講得唔明都唔好見怪。不過我自己就好有信心只係要練習多d ^ ^

如果大家有興趣參加, 可以比隻貓我, 因為一班只係收10個學生, 先到先得...hahaha

P.S. 今個sunday滿左額拉

瑜伽表演

Thu, 26 Apr 2007 01:38:32 GMT

距離表演既日子越黎越近, 心情亦越黎越緊張, 好驚做錯記錯走位等等。雖然大家都不斷咁彩排, 但都係有時太快有時太慢。而個間主辦機構又好緊張, 不過話晒人地係大公司要求係高d, 連我地個日d髪型、化妝都要試一次先。不過見個個箸晒白色衫褲同化晒妝又係另一種感覺, 好清新同脫俗好配合佢地d產品要求優美同高貴。當我地睇番VIDEO時又真係好襯佢地個主題喎。

主辨機構要求今個星期六彩排一次比佢地睇, 真係好緊張好緊張, 希望大家都做得好好睇睇拉。

烏龜變營火蟲

Wed, 25 Apr 2007 02:24:24 GMT

考試期中一個環節係pose to pose, 我就決定要做 Titibasana(營火蟲) 轉做 Kurmasana(烏龜)再還完番Titibasana(營火蟲)。呢個夠晒難度分, 有齊柔軟度, 力度同平衡力三樣野。呢2個動作我都己經練習得幾純熟下, 但係一連埋就唔夠力上。尋日終於請教左老師, 原來好靠腹力同平衡來支撐個身體上同落, 雖然明白個方法但係都係做唔到, 不過仲有半年時間比我練, 希望有一日能夠做到, 正如B.K.S. Iyengar以下咁講 :

"You must develop character as the kurma the tortoise. When once it is in its shell nothing at all can disturb it . In kurmasana you are unable to see anyone or anything, obliging you to turn your attention inwards’’ B.K.S. Iyengar